Dîre qui dj'aveûve sondjî, to waîtant lès batias

Qui ça d'veûve yèse plaîjant di viquer au solia

Adon dj'a pris mès loques, mès solés èt m'tchapia

Et mi v'la vos tchantant one saqwè d'to novia

Qwè d'joz mès vî soçons, l'histwère n'èst nin novèle ?

Ca djè l'saîs bin èt to maîs faut qui dj'vos rapèle

Dins l'vîye c'èst bin l'amoûr qui faît brûler l'tchandèle

Mi dji sos Namurwès, l'out' èsteûve di Marsèyes

Dj'a rèscontré Pagnol, Mârcèl di si p'tit nom

To rawaîtant one pîce disu l'tèlévisiyon

L'afaîre èsteûve plaîjante èt dji riyeûve po d'bon

Èt adon dj'a sondjî d'èl faît v'nu au vî pont

Dji sos fiyére audjourdu di v'nu vos présinter

Françwès èt tote si clik au tèyâte dès Wallons

Si vos n'èl v'loz nin veûye dji n'ès sèrè nin mwaîs

Djè l'rimètrè dins l'drèse didins l'ridan d'aû fond

Portant ça m'freûve plaîji dè boûter avou vos

Nos poûrînes quétfîye bin nos rèscontrer on coûp

Po nos dîre qu'adlé Mousse on y èst bin èt to

Èt qui l'vîye èle èst bèle quant-on  y faît c'qu'on pout.