Mosieû

Mosieû,c'èst bin a mi qu'vos d'joz mosieû

Vos vères i faureûve lès r'nètî

Vos n'divoz nin yèse di parçi

Po n'nin veûye qui dj'sos la waû d'zeû

Faureûve candjî vos oûyes

Qui wét'nut promwinrnér lès poûyes

Qui vont mougnî dins lès rigoles

Plin.ne di c'qui d'meûre di vose pètrole

Mosieû, ni m'loméz jamaîs pu mosieû

Dj'a dandji d'ièse one miète to seû

Dj'ènn'a bin aséz d'vos maniyéres

Mi dji m'éva dins mès mistéres

Quand dji sèrè la waû

Dji vos waît'rè dins vose troupaû

Èt dji chout'rè tos lès ramadjes

Qui vos bwèrléz come dès sauvadjes

Mosieû, maîs dji n'vous pu ièse on mosieû

Tos-qui dji d'mande c'èst d'ièse à deûs

D'rawaîtî tournér lès awîyes

D'lé one bèle qui m'vièreûve voltîye

Dji saurè m'arindji

Po qu'èle ni pinse jamaîs qu'a mi

Dji li don'rè mi coeûr mi vîye

Po li pasér totes sès envîyes

Mosieû, maîs vos avoz co dit mosieû

Lèyîm'tranqu'il' dji sos eureû

Quand dji boute didins mès idèyes

Ca m'faît plaîjî èt dji m'y plaîs

Dj'a pris mès bônès loques

Mi blank'tchimiche èt mès bèrloques

Dji n'va nin distrûre tote li tére

Dji sos bin trop bin dins lès éres

Mosieû, c'èst st' à vos qui djè nn'a mosieû

Vos m'ploz tot printe dji n'a nin peu

C'èst dins m'tièse qu'èle èst m'libèrté

Maîs la vos n'y sauroz rintrér

Vos ploz v'nu à l'maujone

Dji n'vos dirè nin one parole

A trop causér, v'la qu'on tchafiye

Vaut mia tchantér c'èst tote mi vîye