Li tchin to seû 

extrait mp3:textes,mélodie,arrangement et chant : Paulo Partner

ji vins po vos causer d'on tchin todi to seû

Pèstèlant dins lès prés, dins lès tchamps, dins lès bwès

On djou il a vèyu one ribanbèle di leû

Et i lès-a suvût sins waîtî dè sawè

Il a roté lontimps padri-z-èls sins rin dîre

To chôtant ûlûlé li pu grand, c'èteû l'chèf

D'timps-in timps i riyeûve maîs c'èsteûve po faît dire

Ci qu'lî pèseûve li d'pu, c'èsteûve li détrèse

Gn'à mwins côp sins l'mostrer i rawaîteûve lès steûles

Quétfîye qu'il y pôreûve trover one èspèrance

Lès djournéyes qui pasînent èstînent todi tote seûles

'L'aureûve bin v'lu trover on to p'tit bokèt d'tchance

On bia djou, poqwè li, au mitant d'one pèquéye

Vola qu'il èst tchèyu sins l'sawè, sins l'volu

Divant one bèle comére qui l'a èmacralé

Rin qu'avou sès deûs-ouyes èle l'a mougnî to cru

Li grand tchin, to d'on côp a sôrti d'sès miséres

Il a min.me faît do feû èt candjî sès maniyéres

Po on bètche on calin il aureû r'tourné l'tère

Maîs i n'valeûve pu rin s'èle si mèteûve à braîre

Z-on s'tî one fâmeuse binde èt is n'ètînent qu'à deûs

Gn'aveûve bran.min dès ôtes maîs is d'mèrînent su l'soû

Quant-on-z-è vèyè onk, i n'èsteûve nin to seû

Is s'vèyînent fwart voltîye, on pou dire ci qu'on vout

Li djou qu'èle èst st-èvôye, on matin, en djanvié

Ele èst st-èvôye véla d'ou qu'on rivint jamaîs

'L'a rapicî sès loques èt r'mètu sès solés

Po ralér dins sès tchamps, dins sès bwès, dins sès prés

I s'pôreûve qu'on bia djou vos l'aloz rèscontrer

Ni pètez nin au djâle, vos n'sèroz nin djondu

S'il a dès ouyes di sot c'èst pace qu'il èst pièrdu

Ci tchin la, vos vèyoz, ni catche qui

L'amitiyé