Au d’bout d’èl né

I faut vraîmint qui dji vos cause

D'one comére qui dwâme avou mi

Dji veû bin qu'vos pinsoz ôte tchose

Ni m'fioz nin dîre c'qui dj'n'a nin dit

Ele èst l'pu bèle di tos lès andjes

Qui s'promwinr'nut au paradis

Ele a one place disu leû plantches

Dji saîs bin qu'ils li ont d'ja dit

Maîs èle dimeure didins mès sondjes

Ele èst dins m'tièse èt totes lès nés

Ele mi rinds l'pu eureû au monde

Et c’n’èst nin d’mwain qu’èle va ralér

Po l'faît viquér

Dins totes mès nés

Dji m'lé alér

Au d'bout d'èl né

I faut vraîmint qui dji vos cause

D’on sondje qui n’mi vous pu lachî

Si mès oûyes ni sont nin au laudjes

C’èst qu’tos lès matins, i flauwi

Quand dji m’dispiyète, qué comèdîye

Dj’y vôreûve portant bin d’mèrér

D’lé tos cès ôrs qui dj’veû voltîye

Qui mès mwains n’polenut atrapér

Dj’a peû do matin èt do frè

Portant i faut bin y alér

Ritrovér lès-omes èt lès lwès

Qui vont m’faît braîre à tot skètér

Po l'faît viquér

Dins totes mès nés

Dji m'lé alér

Au d'bout d'èl né

I faut vraîmint qui dji vos cause

D’on payi qui dj’a inventé

Il èst bin long di totes les fauves

Qu’on a bin pu vos racontér

On n’s’y cause nin di djalous-rîye

On n’s’y bat nin come dès twârdus

Tos lès djins s’y veûyenut voltîye

On s’y toûwe nin à l’vol non pu

C’èst co pu bia qui l’paradis

Tos lès djins sont todis contint

Tos lès djous on tchante èt on rit

On s’promwin.ne pat’tavau lès tch’mins

Po l'faît viquér

Dins totes mès nés

Dji m'lé alér

Au d'bout d'èl né